Rété doubout
(traduction créole de « Invictus« , poème préféré de Nelson Mandela)
Gény COINTRE
Toutalantou an mwen, yenki lannuit
Konsi dyab-la té wouvè on chodyè
An di « mèsi » tout BonDyé ki isit
Davwa nanm an mwen ka voyé limyè !
Tout kalité mové sityasyon
Pa jan fè mwen pliyé: fô té tchenbé !
Lè la dévenn vini pwan pozisyon
An dwèt bigidi, mé an pa tonbé !
Kotésit, lanmizè fè on katchimen
Davwa ni yenki soufwans é malè
Mé pon danjé ki pou rivé démen
An pon jan, pé ké rivé a fè mwen pè
An ké pasé! menm pa on tou a zégui !
Menm si kont mwen, tini onlo témwen !
Sé mwen ki mèt a sa an ké divini
Sé mwen ki ka gidonné nanm an mwen !
Genny Cointre est l’auteur de « Défrisés, grenné, ou jiskont« , un recueil de contes et poèmes composé d’un livret et d’un CD.
